ABAKOZI B’IBITARO BYA KACYIRU BIBUTSE KU NSHURO YA 31 JENOSIDE YAKOREWE ABATUTSI MU RWANDA.

ABAKOZI B’IBITARO BYA KACYIRU BIBUTSE KU NSHURO YA 31 JENOSIDE YAKOREWE ABATUTSI MU RWANDA. 

 Iki gikorwa cyitabiriwe n’Umunyamabanga nshingwabikorwa wa IBUKA ku rwego rw’igihugu AHISHAKIYE Naphtal ari nawe mushyitsi mukuru ,Umuyobozi w’ inama y’ubutegetsi y’ibitaro bya Kacyiru Yvonne  KAYITESHONGA , Umuyobozi  Mukuru w’ibitaro bya Kacyiru CP(Rtd) Dr Daniel NYAMWASA, abakozi  b’ibitaro ,abarwayi n’abarwaza. CP (Rtd) Dr Daniel NYAMWASA Umuyobozi w’ibitaro bya  Kacyiru atanga ikiganiro.

Umuyobozi w’ibitaro  bya Kacyiru ari nawe watanze ikiganiro  kuri uyu munsi, yagaraje  ubugome ndengakamere bwaranze Jenoside yakorewe abatutsi  mu Rwanda ugereranije n’ahandi  hose habereye Jenoside kw’isi, kuko mu Rwanda umuyarwanda yishe undi munyarwanda amuziza ko ari umututsi, umugabo cyangwa umugore akica uwo bashakanye, umubyeyi yarihekuye, umwarimu yishe abanyeshuri yigishaga noneho ibirenze umuganga yishe  umuganga  mugenzi we arengaho yica n’abarwayi ,abo bose bishwe bazira ko ari abatutsi, icyo bita mu rurimi rw’igifaransa:“Jenoside de promiscuité”.

Yasobanuye aya mateka  ahereye  ku nkomoko y’uyu Rwanda ,uko abanyarwanda bari babanye mbere na nyuma y’ubukoroni  ndetse n’uruhari rw’ubukoroni  mu kubiba urwango.Yerekanye uko Repubulika ya mbere n’iya kabiri zabagariye urwo rwango kugeza aho mu 1994 abasaga miliyoni bishwe mu minsi itarenga ijana.Yibukije ko:“Umuvuduko wo kwica wari ku rwego rwo hejuru,hicwaga nibura ibihumbi icumi ku munsi kandi ubutabazi bwari bugoye kuko abari batabaye bari baturutse kure mu gihe abicaga bari abaturanyi,ababana cyangwa abararanye”. Yasoje iki kiganiro asaba abanyarwanda kureka kuba banyamwigendaho (self centred)ahubwo bagaharaniragukunda abandi(Altrwiistic). 

Umuyobozi w’ibitaro bya Kacyiru nk’umwe mu bagize uruhari mu kubohora u Rwanda yashimiye Umukuru w’igihugu Nyakubahwa Perezida Paul Kagame ari nawe wari uyoboye  ingabo zabohoye u Rwanda(RPA) asobanura ko yarenze kuri aya mahano akimakaza umuco w’Ubumwe n’Ubwiyunge n’umutima w’imbabazi, aho uwishe  yungwa n’abo yiciye bakongera bakabana ,ari byo byahindutse  umusingi w’iterambere u Rwanda rugezeho uyu  munsi. Yibukije nanone  imvugo   y’abanyarwanda ,yavugaga ko “Ingoma idahora iba ari igicuma ariko Perezida Paul Kagame yarenze iyi mvugo yimakaza umuco wo kutihorera ahubwo asaba abanyarwanda  kongera kubana mu mahoro nta nzigo. 

 Umunyamabanga nshingwabikorwa  wa IBUKA  ku rwego rw’igihugu yashimangiye  impamvu kwibuka ari igi korwa ngaruka mwaka mu rwego rwo guhererekana aya mateka ku bato ngo hakumirwe  icyo ari cyo cyose cyatuma Jenoside  yongera kubaho, asaba abitabiriye kwimakaza umuco w’amahoro  ndetse  no kurwanya ingengabitekerezaho ya Jenoside n’ibikorwa biyiganishaho. 

Yashimiye kandi abakozi b’ibitaro bya Kacyiru uruhare bagira mu kwita ku barokotse Jenoside yakorewe abatutsi batishoboye, babaroza inka 10 buri mwaka mu mu rwego rwo kongera  gucanira bagasubiza ibyansi ku ruhimbi n’ibisabo ku bibero

.

Muri iki gikorwa kandi hatanzwe ubuhamya bw’umwe  mu bari baturiye ibi  bitaro mu gihe cya Jenoside yakorewe abatutsi, wagarutse  ku bugome ndetse n’ubwicanyi bwabereye mu murenge wa Kacyiru aho ibitaro bibarizwa n. Hacanwe kandi urumuri rw’icyizere nk’ikimenyetso cy’ejo hazaza heza.   #Twibuke Twiyubaka. 

#amafoto    

 Abakozi b'ibitaro  bya Kacyiru bibutse  abatuti s bishwe  bazira ubwoko.